العشب يلوي به هبوب العواصيف= ابعد ثرا الفيضه ونبت الوطا جف
خضار نبته صار به يبس يامنيف= أذ وت زهوره والورق صاربه حف
ليت الليالي للقلوب المواليف = تحقق لنا شف وتأمر لنا بشف
يبقى خضار النبت والأرض به ريف= حتى ضغوط النفس عن ضغطها تخف
يامسندي ياريف هجنٍ مواجيف= حفيا وطفيا والتعب طفهن طف
هلهن من النكباء لحاهم مشانيف= ولفن على اللي يرخص الكيس والكف
قرم يهلّي بالنشامى لياضيف= يضحك حجاجه وباللوازم يشرّف
يذبح لهم كبش يكرّم به الضيف= يا ما التعب والجوع ماكن به لف
وساحة خواطرهم بزين السواليف= فهود الرجال اللي فعوله تسولف
على الهجن وفوق المهار المزاغيف= يوم الرّدي يمشي وياقف ويوقف
مثل الصقور الجارحات الخواطيف= بمخالبه تفرس ماهو كود تعلف
أن وردوهن عيف وأن صدرن عيف= بكرهٍ وخوف وعنهم الخيل تحرف
سوالفٍ تارد وهذي مناكيف= وجور الليالي والتّعب خفته خف
ودنياك ماهي دايمٍ لك على الكيف= لابد لك من حوض الأقدار تغرف
للوقت سطوات ولفوات ويخيف= يقدم بهاء صفٍ ويفهق بهاء صف
ننزل منازل من رحل بأول الصيف = ونرحل وينزل بعدنا لاعب الدّف
ولا تنفع الأقوال ياحيف ياحيف= وجور الزمن لو تطلبه عف مايعف
لابد ماتأكل عضاك الزواحيف= أضعف جنود الله توطاك بالخف
بأمر الذي وسّر لك العسب بالليف= تدري وانا أدري وكثر الناس يعرف
وصلوا عدد رمل الوطا وعد ماشيف = على الرسول وعد مابارقٍ رف