يوم الخميس الدمع عيني تكيله = ماوقـفـت تنثر غزير العباير
هذا هو المكتوب مافيه حيله = حكم القدر يجري على العبد صاير
أغلى بشر بالكون تعلن رحيله = ودعتها والركب بالخير ساير
أشتلت همي والحمول الثقيله = والخاطرالمكسور ماله جباير
غرس الثمر فالوقت نجني حصيله=حال البشر فالوقت والوقت جاير
وش عاد يبقاله وأنا وش بقيله = ياكود ذكرى في حشاي وحساير
يرحل بي التفكير يمه وأجيله = وأذكر زمان ٍفات كله عزاير
أدعي لها بأمر الولي كل ليله = بجنات عدن ٍ يسكن أم البراير
وصلوا على من لانبي بديله = أعداد مابالكون ماشي وطاير