مبداي احيي بالوجيه المسافير = تحية المسلم على جمع الأسلام
والشعرحل ووردن المباكير = شعرٍ جديد اليوم ماهو من العام
والشعر به حكمة وصورة وتعبير = وعند العرب يحل محل الأعلام
واحلاه مايعطي عن الوضع تصوير = ويكفيك عن لوحة وريشة ورسام
ولأجل العطوني مانقول المعاذير = نقول يابو عبيد دام الفرح دام
وعسى السعادة فالكم والتباشير = وافراحكم تدوم عامٍ بأثر عام
وياعبيد يازامل عسى فالكم خير = وعسى الفرح يبرالكم طول الأيام
ياعيال عودٍ من رجالٍ مناعير = من لابةٍ له بالعلا مجد ووسام
من سلسلة غالب الى جدنا خضير = عيال اليتيمي حي والله من ايتام
اهل الصياني والدلال المباهير = في وقتنا الحاضر وفي ماض الأيام
واهل الرماح اللي تفج الاباهير = يومنها برماح وبشلف وحسام
قومٍ لهم في صفحة المجد تسطير = بحبرٍ حمر وحد المهند له اقلام
وتاريخهم من دور عرار وعمير = له منزلن بين اكثر الناس قدام
ربعي وانا اللي فيهم ابخص من الغير = ما قلت زور ولا تحذيت الأوهام
ومدحي لهم ما يلحق الغير تقصير = كل القبايل به مداغيش وكرام
لاشك ربعي لي مثل ماكر الطير = والطير يعرف ماكره كل ماحام
وانا احمد الله من خيار المواكير = ماينتج إلا مثل غاشم وغشام
واليوم من فضل الولي حالنا غير = امن وامان وسلم واسلام وانعام
في ظل من غطوا جميع المشاهير = سادات في شبه الجزيرة وحكام
آل السعود اهل الفعول المغاتير = بيضٍ فعايلهم مثل بيض الأعلام
اللي حكموا بالسيف هو والدنانير = ودستورهم بالحكم من هدي الأسلام
وصلاة ربي عد نبت النواوير = على النبي اعداد من طاف بإحرام