غلطان يوم إني تهمت المراسيل=حسبتهم مايوصلون الرسايل
ماطعت من كثر علي الأقاويل=ماجال في صدري من الشك جايل
ياأم العيون الناعسات المظاليل=سكرتي بوجهي جميع الوسايل
مشاعري كم له بسجنك مكابيل=ودموع عيني مثل وبل المخايل
عفت الرقاد وعفت زين التعاليل=ذوقي نقاذ ولاورى السهر طايل
أباعد اللي ينشرون الأباطيل=وارتاح بالبر عن وزيز الموبايل
ليه الصدود وقطع حبل المواصيل=وأدري بقلبك مارضابي بدايل
ترفقي بالقلب يافتنة الجيل=لو إن في قلبي جروحك جلايل
تسوين عندي لابسات الخلاخيل=لولا التغلي كان مالك مثايل
روفي بحالي بالليال المقابيل=حبك دليلي لو تضيع الدلايل
خوذي تقهوي من عروقي فناجيل=مادام لك بين الحنايا نزايل