حنا على الدنيا ضيوفٍ راحلين=بخيت من أنهى الحياه بسجدته
مطارٍ وكل من لِفُوه مغادرين=وكلٍ يناظر لين تُعلن رحلته
رَجْلٍ تزوّد بالتُقى دنيا ودين=سبّح ولو ضاعت من ايده سِبحتَه
وناسٍ عن الطاعه ودربَه مبعدين=تركض ورى دنياً تجاهل قَلبتَه
وحنّا مابين اهل الشُعَب متشتتين=وكلٍ يدوّر بالعجاجه طاسته
الشيعه اللي دوّروا دم الحُسين=اربع طعش قرن ونعاني ذبحته
وبنو أميّه قد خلوا بالغابرين=وندفع ثَمَن طيشات شِمْر وسيّتَه
والموت لآمريكا شِعار السّافِِلين=كَالعاهِره وتحالف بعُذريّته
وسايكس وبيكو لو عربنا صالحين=بِلفور ماخيّر يهودي دولته
والشرق الاوسط فتّت المتفتتين=مسرح وقرّب يسدِلون ستارته
وحنا بطين التابعيّه غارقين=والخي مافك الصياح لخيّته
الذُل ماجانا عبث يافاهمين=الله عطى كلٍ على نفسيّته
يوم الصحابه للسننّ مطبقين =ربي عطاهم عزته وحمايته
ويوم إن غدينا للكتاب مهاجرين=ومن رمضان ليا رمضان بقفلته
صرنا تَبَع صِرنا خَدَم للخانِعين=ونبرر اخطاء الرئيس وزلّته
آمنت أن العاقبه للمُتّقين=والمتّقي يرفى الخوي بغلطته
البطن والفرج ولسانه صايمين=ويراقب الله في عَلَنْه وخلوتَه
بالحق يَصدح لايهاب ولايلين=يميّز الباغي ويعلَم نيّتَه
والفتنه اللي أربثت بالعالمين=تبي الفهيم اللي يحدد وجهته
تهنا وتاه اللي لفونا تايهين=والتايه يتوّه دليل بتوهتَه
ربي طلبتك يانَصير المُبتَلين=اميّز الباطل واجنّب جيهته
وأكتُبني من التائبين الآيبين=والمصطفى أتبع خُطاه وسُنتَه
صلى الله وبارك عليه بكل حين=خير البريه من ينادي أمّتَه
ياجعلنا من حوضه من الشاربين=نفرح بترحيبه ونشرب حفنته
حنا بهالدنيا ضيوف مغادرين=وكلن نطر رقم العبور لرحلته