الجسم ماهو للمشاكل شراعي= ولا الصدر عد للهواجيس مارود
مال السهر والهجس ياعين داعي= الرزق محدودٍ كما الأجل محدود
سج القدم بأرضٍ فجوجه وساعي= على رحابه يطرقك بارد النود
بصحاريٍ والوقت فيه اتساعي= يغدي هواجيسٍ تحدك على الكود
ورق الطوال وخل عينك تراعي= وطرق نظرها بوادي ماهو مسدود
بأرضٍ نباته فوقه الثلج ماعي= ريحة زهر نبته تقل ريح كمبود
نعالج هواجيسٍ هجومه جماعي= وخل العفون بفرشها يأبو جلعود
اللي هروجه مثل سم الأفاعي= ومن جادله خسران ما يكسب الفود
شوف الفياض والقمر له شعاعي=تطرد هجوس اللي جفاء عينه النود
بديار منهم يشمخون الرباعي= حماية الأضعان ياثار بارود
أعمارهم عند اللوازم تباعي= دون الظعن واللي هدب عينها سود
كبار الصحون مدلهين القطاعي= اللي يقودون الجهامة هل القود
اهل البكار اللي حواره يعاعي= بأرضٍ نباته علّها ديم ورعود
قطعانهم غيم مع الجو زاعي= ربعٍ تحوش الجود وتعطي من الجود
عسى لهم بذيك الروابي مراعي= بديار عذفاء والرعن وخر مسعود
والله يجنبنا القحط والمجاعي= وكل الديار وساكنه بخير وسعود
وإلاّ التفرق مقبلٍ ولوداعي= ولا حي إلاّ لتربة الأرض مردود
حكم القدر يأخذ علينا القطاعي= ويستحصل الديان من سعد وسعود
يهديك صاع ويأخذ الفين صاعي= ونهاية الأجسام ملفاه لدّود
وأقدار دنيانا سهومه سواعي= العود له ساعه واللي تو مولود
لا صفر العداد للأمر أطاعي= تصبر لوأن من التعب يلحقك زود
وختمت مابرمجت وما ضاع ضاعي= وكل علم ما حفظه القلم بحكم مفقود