يالله يامنشي ثقيل الخيالي= يامن بأمرك تجري السفن وتسير
سارة على موج يطم الجبالي = وصلف الهبايب تصفقه والمعاصير
وحكمتها ياواليٍ كل والي= ياما على الجودي رسن المسامير
بحكمك ولطفك ياعزيز الجلالي= يامدبر السقاء عليك التدابير
تجعل لنا في ظل عرشك أظلالي = في ماقف مابه شيوخ أوهوامير
نخرج من الدنيا بستر الحوالي= وخواتم الأعمال تختم لنا بخير
العمر عهده ومرجعه لزوالي = قبلك من المخلوق مرّت طوابير
سادت وبادت ولا بقى له توالي= إلا الرسوم اللي بها ينزل الطير
صالة وجالة وراح به كل غالي= ناسٍ عليها ورد وناسٍ مصادير
وأبن أدم عمره مقسّم ليالي= من أحداث بقعا ماتفكك نواطير
العصر الأول جاهل وبك أهبالي= ماتعرف الأشرار من اللي بهم خير
طيش وجهل وأكثر حلومك خيالي= أحلام ليل ضيعة سالم الزير
والعصر الثاني صرت رجل العمالي= تكسب دنانير وترهن دنانير
تفتح مشاريع وتجمع حلالي= تصدر فواتير وتقبض فواتير
بالمال تفخر وبالمناصب موالي= بقوة وعنف تصدر الأمر تصدير
والعصر الثالث جاك عيب الرجالي= حيلك ضعف وخطاك به صار تقصير
تنوض مثل اللي برك بالمفالي= خلنّه القطعان وأقفن مدابير
تراجع وتشكي من المرض والهزالي= كل يوم لك موعد فحوصٍ وتقرير
والعصر الرابع قلت ياما مضالي =ليته تعود أيام عمري على خير
عفت الجماعة والأهل والعيالي= وعافوك ربعك وجنبوك المسايير
والعصر الخامس طحت في كل حالي= ماينفعك مالك ولو قيل يأمير
والخاتمة شالوك للقبر تالي= تبعوك ربعك وأدفنوك الحوافير
رجعوا هلك وأقاربك والخوالي= وبقى العمل بالقبر لك جار وأمجير
هذي النهاية ياحميد الخصالي= وعند المحاسب ينشرن التقارير
هذا كلام مجربٍ كل حالي= زينه وشينه ذاقها ومر بالسير
وختمت مابرمج لساني وقالي= وعلى الولي أظهار الدلي من أسفل البير