يا ابو فرج ياليت لي مــقـدريه = على هجر يامسندي ديرة السيف
مير البلا ياخوك بالــعـسكريه = ماعاد لي فرصه ولالي محاريف
مسجون بامر اللي يقود السريه = ماهي على ودي ولاهي على الكيف
أثــر اليالي ياتليعان سيه = نمشي لها بالغـصب يامـكـرم الضيف
لا واهني من داج بارضٍ خليه = في بر يطرقني هبوب الشفاشيف
في ديرةٍ عذبٍ هواها نقيه = مابه سوى الغدران والصيد والريف
وايضا اتمنى شوفة الشمريه = اللي جرالي من غرامه تــكــالــيـف
ابو جديلٍ طيةٍ فوق طيه = داف الحشا راع الثمان المراهيف
أنا بدوي واللي هويت ابدويه = شمال من حائل وشرقٍ من اطريف
اللي كوت قلبي بتسعين كيه = مافيهن اللي لاقرب الناس قد شيف
اقول ياتليعان لا ماعــلــيه = وانا ضميري كن يــركز به السيف
اخوك ما يضعف اعزومه قويه = ولا يبدي اسراره لناسٍ ملاقيف