الله على اللي ماجنوها المخاسير=" تايفون " محكم فنها بالقياده
لا ضاق صدري أنهضه حزة عصير=وأجعل خفوقي يمتلي بالسعاده
ولازان جوي قمت أسوق التعابير=شطر ٍتحت شطر ٍتقادح زناده
يصف شعري مثل صف الطوابير=غصب ٍعليها تنحني للسياده
وأرفع عيار الصوت من غير تفجير=يشوش راسي لا رفعته زياده
عشقي كذا ماهو بعشق الغنادير=يلعنك يا حب ٍتحول نكاده
لو كان اسمي يعشقونه جماهير=ماغير حب ٍراح طول بعاده
دنيا تشقلب مالقينا بها خير=دنيا تخالط نورها مع سواده
ناس ٍنشوفه يعشقون المشاهير=ناس ٍوربي تستحق الإباده
المسأله شعر ٍيجي فيه تصوير=والشعر ماهو للرجوله شهاده
ياكم شاعر يشبهه نافخ الكير=وياكم شاعر يستحق الإشاده
عجزت أكافح بالليال المعاسير=صرت الفقير اللي تقاطيع زاده
الأرض ضاقت بالرجال المناعير=أرض ٍجفاها يارفيقي براده
أتركني ألعب بالسماء ياملا الطير=الله هو اللي عالم ٍفي عباده
لو كان ربعي ياعشيري مناصير=الأسلمي لا شك فيه القراده