ماني على ظنك ولا انته بغلطان= الوقت مانعلم خوافي صدوفه
إتعب إركابي مقصدي طيب وحسان=حرٍ ويشبع من مساطي كفوفه
اكبر من المنقود وصفه بليهان=مرامه العليا ويلحق أشفوفه
شاعر من العصلان لشعر عنوان=لأطلق عنان البيت تدهش أحروفه
إن ضاق صدره جاب لولوا ومرجان=وإن راق جاب المستحيلة يحوفه
والياحصل من صاحبه زلة اللسان=أدمح له الزلة وراعي أظروفه
والليل يفتح للخيالات بيبان=وتفضح أنجومه مستتر وسط جوفه
وصوّر المستور صوره للعيان= تأتي قصيده دون وصب وكلوفه
راسي وعيني والصدر كنها أوطان =سكانهم عالم وغير أمعروفه
عالم على الإسرار سترٍ وكتمان =بعيونهم اقرأء وجيهن تشوفه
بصمت السكون اجر حرفي على أوزان=ارفع به المرفوع في راس نوفه
ماني على ظنك ولا انته بغلطان= الوقت مانعلم خوافي صدوفه