مؤمنه في حكم ربي ياهلي=وماكتبه الله علي لازم يصير
راضيه بالي كتبه الله لي=وإسمعوني لو سمحتوا للأخير
إسمعوني ولا تقولوا كملي=وأبشروا في فكرتٍ ياربع غير
القدر من عند ربي منزلي=سنة الله بالكبير وبالصغير
والمصايب لازم إنه تحصلي=وقصتي صارت ولا عنها مطير
والله الواحد لعبده مبتلي=وكل عبدٍ صابرٍ موعود خير
والحزن والهم باكر ينجلي=ينجلي مادام لي ربٍ كبير
لي عمام ولي خوال لي ولي=وظل جدي يجلي الهم الكثير
ياجماعه لو دموعي تنزلي=لو دموعي جارية مثل الغدير
بس قلبي صابرٍ متحملي=صابرٍ قلبي مثل صبر البعير
والعز لا ذعذع الشرقي علي=ريحة الغالين في صدري تحير
والرجاء من عند ربٍ معتلي=واحدٍ ماغيره أحد لي دبير
والوعد لا من طوى الله عملي=يالله إنك تبعثن بوجهٍ منير
وبنعيم الخلد أكرم مدخلي=مع أبي وأمي طلبتك يامجير