ياهاجسي وين انت يوم اني ازهمك=عندي كلامٍ كنَّه السلسبيلي
ترى الخبر ياهاجسي حيل يلزمك=خلك على شاني لفكري عميلي
ياقافي المطنوخ افهم وانا افهمك=والكل منا يتصف بالجميلي
هبَّت هبوب المدح والعطر من فمك=والناتج المطلوب قافٍ جزيلي
قم يانديبي واستمع يوم اكلمك=إسلم وسلِّم لا لفيت الجهيلي
هذا عياده واسأل شمر تعلمك=عن سيرته يعطونك اكبر دليلي
سمَّاه بيرق شمر الشاعر السَّمك=رويضان بن جسَّار والقول قيلي
سلام يارجلٍ على العز معلمك=ياشبه حرٍ فوق راس الطويلي
معنى القوافي ترسمه يوم يرسمك=طرقت بحور الشعر بالمستحيلي
أنت الفهيم وباقي الناس تفهمك=وانت الذي بالطيب مثلك قليلي
أبوك من طيبه على الطيب علمك=والشبل عن درب الأسد مايميلي
وآخر كلامي أدعي الله يسلمك=من كل شرٍ يالبطل يالأصيلي