الله على ذيـب الغراز لاقام بالصحراء ينوز=حلو الهياكل والطراز يرهب خصومه لابرز
نال الـمـدايـح بأمتياز من كثر ما دلا يـفـوز=والجيب شيخٍ مايراز عند الـمـجـاكر واللـزز
مفتاح تشغيله جهاز عـقـب الظفيره والفيوز=والـزر الآخــر للـقـزاز ماهي محاحيل وخرز
النور بالتصميم غـاز والـقـيـر لـه عـدة رموز=وعنده على الدرب احتراز من لمبةٍ نوره غمز
يلعب على القاع العزاز لا هابته كل البنوز=لعبة مشـرف في نواز والا الارانب والخـزز
بالدرب مافيه اهتزاز ولايزعجك قدح القزوز=يبرم صحاصيح الحجاز وان طال دربه ماعجز
تحت الذي بالطيب فاز نقوة مطانيخ العنوز =له خاطرٍ ماهو نشاز احلى من اثمار الكرز
للي خفوقي فيه باز من ضيق تفصال الجنوز=يفصل عـمـود الارتكاز وماالوم قلبي لو نـقـز
طعنة خفوقي يوم جاز ياتقل حافرها كـروز=او كـنـهـا بـيــر ارتواز مايـقـطبه كـثـر الـغـرز
رح له بلا ختم وجواز وقل له فعولك ماتجوز=مادام رمشك مايهاز وش بـه بـمـعـلـوقي ركز
لايخدعك هرج الخناز الـلـي يـديـرك باللـغوز=وزدتوا لهيب الجوف قاز من لامـزٍ فـيـني لمز
في خافقي تسوى الركاز اللي بها كل الكنوز=وكان الهوى فيه ابـتـزاز همزة مقـيـط اللي همز