في حلال اللابه اللي يدركون المستحيله=ياسلام الله سلام لكل وافي في محله
ازهمو لا الشاعر اللي مايجيب الا الجزيله=لاعقدت الحبل يعرف يالنشامى كيف حله

مرحبا ترحيبةٍ ترضي قبيل من قبيله=اسمك السيف الشطير ومن معه سيف يسله
يارفيقي لامشيت الدرب تلقاني دليله=طب في سوق الخيار وهات كيس وهاك سله

البقاء بك يالمرحب عد همال المخيله=وانت ياعواد شاعر والله انا مانمله
شد حيلك ياالدليله لاتضوي لك فشيله=واعرف اني لامشيت الدرب تاتعجز تدله

ماعليك قصور وافي والشديد يشد حيله=الضماير مستريحة والخواطر مسفهله
اقدح زنادك وشب النار في راس الفتيله=العلوم كثار والمعقود نلقاه ونفله

لاتهقوى ثم تبلش بالكثيره والقليله=العب العب تو ليلك بس لاتدخلك ذله
فيه راسً طال عمرك ودك ان الله يزيله=عل ناسً ماضرت للضيم جعل الله يعله

الهقاوي عند شاعر يبري الكبد العليله=لو يطول الليل يشفي من جزيل الشعر غله
ارفع يديني وأمن مع دعاك بكل ليلة=واسمع الراي المحايد في قناة المستقلة

كفو ياعواد وادري كل حملاً ترتكيله=مير لغزي كان تقدر ياعميلي جيب حله
ماقصدنا اللي قصدتم لو رمعتكم جميله=مقصدي مايظهره ياخوك تلفاز ومجله

انت خجلني ثناك ولابقا للحل حيله=لايطب الفار بيت العنكبوت ويستحله
كمل الدعوا وبين شاهد العلم ودليله=تم تأجيل القضية لين تكميل الادلة

كان راح العلم الاول دوك يالطيب بديله=شي واضح والهدف ياخوك حاول ماتزله
من هو اللي وسط بيته ناس ماتلقاء العبيله=وهو خيره ياعميلي كل جارً واصلاً له

القضية فلصت والسيف مدري من كفيله=الولد دانه لسانه وانقرد وابراي لله
من جحيم الفقر يشكي كل فرد وكل عيله=المسالم في خرابه والحرامي وسط فله

شرهة العالم تراها تلحق اصحاب الفضيله=لالقيت الشيخ منهم ياعميل الخير قله
من يقول الخير ضافي ياعسى ربي يشيله=كم عودً دمع عينه من سبب فقره يهله

لاغدى التبرير غاية تصبح الفتوى وسيله=من هداه الله تثبت والثبور لمن يضله
والسلام ختام للي جمل شعار القبيلة =ذاك ابو غازي فديته والنشامى في سجله