لغازي العواد مني نصيحه=والنصح للفاهم يزيد استقامه
بيني وبينك والعباره صريحه=بمصاحب الخايب تشوف الندامه
امش بطريق اهل الوجيه الفليحه=العز نالوا يابن عالي سنامه
الطيب راعي الطيب يكسب مديحه=مقدرآ عند النشاما مقامه
يفوز بعلوم الرجال المليحه=ويفرض على كل الجميع إحترامه
العرف ميزان العقول الصحيحه=والجهل شر للرجال وغشامه
ماينفع الجوال لولا الشريحه=ورجلٍ بلا عقلٍ سليم طغامه
من لاتوقع ماتقدى مطيحه=خطرآ من الوقعه تكسّـر عظامه
وهنيتهم اهل القلوب المريحه=همه ملي بطنه شراب وطعامه
وجنبه على زين المفارش طريحه=ماهو بيقعد لو تقوم القيامه
وختام ماقلنا بختم الصفيحه=على النبي أزكى صلاة وسلامه