حي الرفيق اللي رقى كل مرقاب = مـَاكـَـرّ شيوخ ومعتلي في جنابه
يقراء بيوت ٍ مبهمات ٍ للاعراب = ويجيب حامض علمها في جوابه
اشفيت خاطر صاحبك بين الاجناب= وزان القصيد وزان خط الكتابه
خليت للمعنى مقابيس وشهاب = والحرف جاء له في وجودك مهابه
كانت بيوت مداعبه بين الاقراب = وصارت قصيد ٍ نايفات ٍ هضابه
ابشر بمن ياقف لها ستر وحجاب = ويرقى بها بين السماء والسحابه
ويقطع لها فيزة تجول مع اركاب = ويروي زهرها من شخاتر إعذابه
حتى يسيـّر صيتها كل الاقطاب = وتـحـلّ عـنـّي بالمجالس إنيابه
والوي لها عنق المخاليق باعجاب = تقلط على زين النبا ماتهابه
ولاتحسبني لنت لعيون الاحباب = إطويق يـَعـّرفْ عزته من رقا به
تدري متى تعلن حدادك وتنصاب = لاضاعت الهقوه بحضرة جنابه
تدري متى تحرق همومك بمشهاب = لاجاتك الزله من ادنى القرابه
تدري متى تبدي مشاريه وعتاب = لاصار لك شخص ٍ سكنت بلبابه
تدري متى تفخر بربعك والانساب = لاصار لك بين الاجانيب لابه
تدري متى للشعر تقدير وحساب = لاصار مثلك واحد ٍ في حسابه
لوشاب قاف الشعر لاجلك يجي شاب= لو بيني وبينه تقوم الحرابه
الشعر له شرواك عاشق وخطاب = اليا التفت يمه عطاه وسمابه
يقطف نواويره بعد خاطره طاب= ويجرّ صوته من عناه وذهابه
يسج لو صدره بها فاس حطاب = يصبر ولو جاء للضلوع انحطابه
يسج في بيد ٍ عن عيون الاغراب= روح عليها الخير ينثر ربابه
غب ّ المطر يمشي ولايحسب حساب = ومرافقه من حكمته يقتدابه
يبغى نزول ٍ تـّكثرّ اهلا وترحاب= من خايع المشقوق لين الغرابه