جيتك بحي المشاعر يوم كان الحـس غايـب=ارمي بحضنك عقالي واعتذر لك عن خطايـه
رحت تايه وجيت عاقل معترف بالذنب تايـب=تهت والخافق غموضه يثبت اني كنت تايـه
كم مشيت بقو راس معانداً لقـوى الهبايـب=ماعرفت انه عنادي هو سبب همي وشقايـه
متجه للشرق غااادي صامد(ن)لقوى المصايب=وفجأه الا الشرق وينه وجهته صارت ورايـه
درت ساحات العواطف ممتطي خيل الحبايـب=رافعا سيف الغرور وتـارك عنـان الهدايـه
ماحسبت الريح طايش يدفع ثقـال السحايـب=لين زخـات المطـر اعلنـت درب النهايـه
صايرا كني سمرمر طار في عالـي الجذايـب=رام هامات السحاب وعـود لعـش البدايـه
جيت لك شوق ومحبه جيت لك والقلب ذايب=جيت لك حامل همومي تعكس اخطاي المرايه
جيت لك ضامي حنانك وانتي لي مثل الوهايب=مابعيني غيرك انتي تـوأم الـروح وهوايـه
والله اني كنت مخطي والله اني جيـت تايـب=للوفا بيسراي رايه وفي يميني الـف رايـه