راكب اللي لامشى والخـط فاضـي=ما تمارا شوفتـه يومـض وميـض
كنـه الشيهـان لاراد انقضـاضـي=اوكما رف القطا فـي يـوم هيـض
جيب لاند كروز وجنوطه عراضـي=ما يجـود طارتـه غيـر الحظيـظ
منوة اللي ضاري لقطـع الفياضـي=مايجـوز لواحـداً قلبـه مـريـض
شاف من وقت الغرابيـل امتعاضـي=وامتلا في داخلـه بالقلـب غيـض
صكته بقعا ووسط المـوت خاضـي=ولا انشحن من برد او من لفح قيض
ماشقى بلميـس ولا هـو برياضـي=ولايشوق خاطره شوف الغضيـض
فلـل التنكيـن والشنطـه مقاضـي=والمسيـر قطـوع والله لـه حفيـظ
لابو طارق لالفيت والبـال راضـي=وصلـه ماخـط بالبنـط العريـض
السنافي له هشاش الجـاش هاضـي=حالـفـاً للـنـذل والله مايهـيـض
امدح اللي لانتخـى للطيـب فاضـي=والـردي بالطيـب والله مايفيـض
الردي لو كانـت متونـه عراضـي=لاارتكى للحمل تسمـع لـه جظيـظ
قاله اللي شاف بالوقـت انغماضـي=والليالي طـوال والمعنـى غميـض
مشكلـه ماحلهـا تسعيـن قاضـي=ولاهقيت يحلهـا مـن لـه نقيـض
مجتمع فيها المسيحـي والأباضـي=وصار كل الامـر بيديـن البغيـض
وضاع في وسط الأكيد الافتراضـي=واستشاطـت دنيتـي يالله تعيـض
عن زماني لاحشى مانـي براضـي=وقت فيـه الحـر يقبـع بالحظيـظ
بالصحاري الذيب يخشى الانقراضي=والثعالـب صيدهـا عنهـا يفيـض
والندم مايرجع اللي صـار ماضـي=والبحر مـن زود حجمـه مايغيـض