وش اللي تطلبه يالمعدن الماسي=وش اللي تطلبه يا الشامخ الراسي
وش اللي تطلبه اكثر بعد مني =الا يامن تزيد الهدم في ساسي
وش اللي تطلبه وش ضل ما جالك=أضنك نايلٍ مني هوى بالك
رضيت بقسوتك واخترت غربالك=عطيتك صادق الاشواق بأحساسي
تجافيني واقول الحي واعذاره=واقول الغايب وعذره بمشواره
ولا ازعل اقول الشخص واسراره=يجوز أسأل ويذكر هم له ناسي
تسهرني واحب لخاطرك ليلي=تعذبني وأحب بلوعتك ويلي
تجرحني واشوف الجرح يشكيلي=وأقول أبداً مهو جارح مهو قاسي
بتهملني وارتب حالي لشانك=وتهجرني وأنا اعشق ديرة أوطانك
اناديلك شعر يجرحني لسانك=وأنا ارسم بسمتي والجرح بي راسي
ولكن هذي المرة نفذ صبري=مع اللي فيه كاذب دايمٍ عذري
الا يامن بأمسك ماخذٍ عمري=عطن عمري كفى يكفي طفح كاسي
كفى يكفي وأنا ادري كاذب احساسك=وأنا ادري قسوتك تجري مع أنفاسك
تدوس اللي شرى وتعز من داسك=تراك مطلقٍ من كل هوجاسي
ترى طالق من احساسي ومن روحي=ترى طالق من أفكاري من اطموحي
ترى طالق من آلامي مـــن جروحـــي=ثلاثٍ قــلـتها ومـا يـنــتــكس راسـي