اعترف بالحب لو مالي حبيب=واعرف ان القلب ميّال عجيب
واعترف للحب مايوجد طبيب=والحظوظ تصيب نوبِ وماتصيب
لاحكم يعطي حقوق العاشقين=والحبايب دوم مثل التائهين
مالهم قانون واللا منصفين=والحظوظ تصيب نوب وماتصيب
واعترف بالناس مخبول وخبيث=وان تكلم شفت منطوقه غثيث
يحسب انه صار للعالم وريث=والحظوظ تصيب نوب وماتصيب
ودام حب اليوم اصبح به شكوك=وان وقعت بحب ربعك عذربوك
وان طحت بأقدامهم والله وطوك=والحظوظ تصيب نوب وماتصيب
نعتزل حب العذارى والسلام=وان شطحنا شوي قلنا ذا حرام
والمحبه تبتدي بنظره وكلام=والحظوظ تصيب نوب وماتصيب
كم حبيب من حبيبه يشتكي=لاتقول اني انا رجل ذكي
شوف غيرك يافتى وخل الحكي=والحظوظ تصيب نوب وماتصيب
العذارى غربلن راعي البشوت=من سببهن مخطرِ يبغى يموت
من القهر هالشيخ لايذ بالسكوت=والحظوظ تصيب نوب وماتصيب
لجل هذا0 الحب والله مشكله=من وقع به شاف ذل وبهذله
ولاهقيت الجيل هذا يجهله=والحظوظ تصيب نوب وماتصيب
جيلنا بالعلم وصل مستوى=سطرو تاريخ بالعلم احتوى
ذي حقيقه يوم غيره ماقوى=والحظوظ تصيب نوب وماتصيب
اخترع صاروخ واهدافه بعيد=والشعب كل يوم يرقى ويستفيد
واعرفو ياناس مظمون القصيد=والحظوظ تصيب نوب وماتصيب
اقصد ان الحب مفعوله خطير=ومن تولع صار هايم له اسير
وان بغيتو شرح عندي له كثير=والحظوظ تصيب نوب وماتصيب
المجرب فاهم طبع الهوى=يوصف الحاله ويعطيك الدوى
والمحبه لاحشا ماهي سوى=والحظوظ تصيب نوب وماتصيب
العمر محدود والدنيا دروس=مايزيد العمر لو تدفع فلوس
وافهم الموضوع لاتبقى تحوس=والحظوظ تصيب نوب ماتصيب
لو سالت الشيخ غايب وش يقول=ليت ابو نبهان يعطينا الحلول
اربعيني تعتقد قلبه ميول؟=والحظوظ تصيب نوب وماتصيب
كان ابو نبهان شجعني شمام=اعتني في منظري بكل اهتمام
كلمته ميزان مافيها كلام=والحظوظ تصيب نوب وماتصيب
وان نصحني وقال مافيها مجال=قلت سم ولااكابر بالوصال
مقتنع من دون ليه ولاجدال=والحظوظ تصيب نوب وماتصيب