ياقلب لاتبلش اذا الناس .. سبوك ..!=لاتقول وش ذنبي بـ شين الكلامي ....!
أيضاً لاتستغرب اذا بـ يوم .. حبوك ..!=بكرا يبيـن النور عقب الظلامي ....!
الناس ياقلبي ترا تنظر .. البوك ..!=اذا امتلا تبدي عليك السلامي ....!
واذا فضى ماكن والله .. يعرفوك ..!=وتصير عند الخلق مالك مقامي ....!
ويصير اسمك بين هالناس .. صعلوك ..!=من عقب ماهو عز كل الاسامي ....!
وتصير في ربعك ذليل .. ويحقروك ..!=وتصير كنك بالشوارع حرامي ....!
وكان امتلا هالبوك ترهم .. يسموك ..!=الطيب الزحزيح شيخ الانامي ....!
ويصير لك مجلس ودايم .. يمروك ..!=ويصير وقتك دايما في نظامي ....!
وبوقت الشدايد دايم الدوم .. ينصوك ..!=لامن غدى في دربهم شي رامي ....!
ياقلبي افهم وافتهم .. لايغروك ..!=اهل الوجيه اللي بها الكره سامي ....!
ياقلبي تكفى لاتجيهم .. ولا يجوك ..!=وخلك مع اللي بالشدايد حزامي ....!
خلك مع اهل الطيب ترهم .. يعزوك ..!=ويرقوك معهم فوق عال السنامي .....!
واهل الردى لاقفيت عنهم .. يذموك ..!=ويصير دربك من عدام لـ عدامي ....!
دربين وانت اختار ياقلب .. لاجوك ..!=وخلك ذهيين ارجوك وافهم كلامي ....!