تال العشاء عديت راس النزاوه=وسقت النظر بالعاليه تالي عصير

وذكرت عصرٍ مثّلوه السباوه=عصرٍ مضى ياناس مافيه تقصير

عصر البداوه والطرب والعزاوه=مع ضف قوم يكرمون الخطاطير

لطامت العايل بسرد الفلاوه=وفي سلمهم للحيل تلقا جزازير

وهنيت شخص مانشاء بالبداوه=مرتاح ماشاف الضعن والمظاهير

ولاتل قلبه حب ذود(ن) نقاوه=فنس الخشوم اللي تنومس على البير

لاجاء نهار الورد فيها عداوه=تدحم هل البوش الحمر والمغاتير

واليا ندبها اللي يعرف النداوه=تسمع صريخ لحِيَّها بالبواصير

سودن طوالن مادخلها رخاوه=شوف النعش بخدودها عز يامنير

وان شدوا البدوان مع درب ناوه=وجروا جرايرها يبون المحادير

فيها مع الممشى جراه ورهاوه=يازين رد عيالها تالي عصير

في خايعٍ نبته جديد وحلاوه=الديدحان مع النفل له نواوير

شرق النفود وغرب جو السماوه=قبل الشواوي يشترون الحناتير

ولاسج باله بالوفاء والنقاوه=مع عندليب(ن) ماربت بالجواخير

يطرب لها المشتاق كل الطراوه=عسلوجتن ماهاتفوها النواطير

ماهوب مثلي فيه هم وشقاوه= اليا ذكر نزل السلف والدواوير

عاف الحضاره والكلا والهداوه =حضارةٍ فيها الطفش والمزامير

والنوم فيها والكسل والرادوه=وراع الولع فيها يشوف التفاكير