سقت الاصايل مع اهل الشعر وبكاري منقاه = احط وسمي على اللي قبلنا ماحد وسمها
اتعب على الجزل واللي مايجملني بلياه =يهمني مبتداها واجتهد لين اختتمها
اجيبها صافيه للي تلقاها مصفاه =واللي علمها يعديها على اللي ماعلمها
هني من يأخذ الدنيا سهاله لامبالاه = لوكان فالبال حاجه من عنا الدنيا كتمها
صحيح مافيه راحة بال في دنيا المعاناه = غايه وكلن تمناها لكن مالله قسمها
تمد بعض التماني مع ممد مقيط ورشاه = الليل ( بنايها ) والصبح هدام ايهدمها
هذي ظروف الزمان انوعها للناس ماذاه = ياليتها بالمقابل تحترم من يحترمها
لوانك تأملت في دنيا العنا مأساه مأساه = اللي نسلم لها واللي بعدها نستلمها
أيامنا والليالي علمتنا درس معناه = ارواحنا فانيه والعمر فرصه نغتنمها
اللي فهم درسها يمكن يحصل درب منجاه = اما خطرها حسب ظني على اللي ما فهمها
اللي تولت تشح بكل شي النفس تبغاه =والى اكرمت ماشبع ذيب المفالي من كرمها
ياكثر الاحداث والعاقل يداريها مداراه = ترمي علينا بلاويها وحنا نقتسمها
الحول لله والقوه وكل الامر لله = والحال ماحد رحمها كان ربي مارحمها