الحب شمسٍ مادنت لليل وطماع الغروب=الحب قاتل لو قتل يحل له الارتكاب
الحب لو كله ذنوب ما اظن عنّه نتوب=الحب حيرة اسأله فيني لقت أشرف جواب
الحب كيف ابوصفه وصفه يذوبني وذوب=يالحب لا تشره علي وصفك يسبب لي ارتياب
لو تجتمع فيك الوصوف الناجحه ترجع رسوب=لو تكتبك كل الحروف ابد ابد مالك كتاب
لا صرت كلمه وحّدت الحالها لسان الشعوب=ما يختلف فيك البشر في قرب او حتى غياب
لا صرت بحساسك تحط الّين في اقسى قلوب=تعطي ولا تاخذ من الواقع مواعيد الثواب
لا صرت مفتاح الفرج لكل ظيق وكل بوب=والصبر من دونك ترى مهما علا طيرة غراب
لا صرت بسمه في محيّا طفلةٍ طبعه لعوب=وأصدق خبر امن المطر واكرم هماليل السحاب
علمتنا معنى الصراحه لا بدت منّا عيوب=علمتنا ان الغلا يرقا ونرقابه هضاب
علمتنا كيف الرجل يصبح مع الناس محبوب=علمتنا ان الخطا ما كل خطا به يستتاب
علمتنا ان العمر لو طال بكتاب محسوب=حسن النوايا والوفا يقود لك روس الرقاب
يالحب وش باقي بعد جيتك وانا فيك مغصوب=جيتك على شان اشتكي يالحب هو ليه العذاب
ما قد حسبت ان الهوى اضحى يميّله الهبوب=ولا قد حسبت ان العلاقه تنتهي بكلمة عتاب
هي ودّها تذلّني وانا لك الله امهيوب=قلّي اذا هي غلطتي اكون في عشقي مهاب
يالحب خذني للقا شمعه على بابه تذوب=أنت الوحيد اللي على موتي يحل الارتكاب