الى تضايق خاطري يابن الاجواد = ادعيتها تعط الفجوج الوسيعه
واخذت لي مع خالي الدو مجراد = اضن مامثل الخلا والطبيعه
لامجاملة صاحب ولا ضد وعناد = ادوس خد القاع واذب ريعه
واخذ بمقعد راعي الرجم مقعاد = واجيب في راسه ضوار المجيعه
لعل عقبه خاطر الضيق ينقاد = والنفس تسلى ذاكرتها الوجيعه
اخشا يفوح الصدر من غير ميعاد = واخاف من قاري الخواطر يذيعه
ماني ضعيف افكار وقليل امجاد = ولا ذل نفساً منزلتها رفيعه
لو كان مالي مع هل العرف ميراد = ماسقتها سوق الذلول المطيعه
نرقا على وضح النقا روس الاشهاد = مانشتري قدر البطون ونبيعه
قدر البطون اتسد به لقمة الزاد = وقدر النفوس الى استصابت شنيعه
وان كان به لوجيه الاوباش عباد = حنا بنا عشق الكرامه طبيعه
ماترخص الا عند هافين الاجداد = والا ولى سني مواريث شيعه
لو عرف راس الجد في روس الاحفاد = ماخالف التالي طباع الطليعه
ربعن بهم راحت على سرج وشداد = مدة مقيط اللي تسمى قطيعه
وابن الردي يطمع بذكر ابن شداد = العبسي اللي مات قبل الشريعه
يا الله ياجايد على كل من جاد = عجل بماننوي ولا نستطيعه
يامسقين عرق المحل عقب ماباد = وعاد الحيا للعود وازهر ربيعه
انت الملاذ وللرجل وقفة اجهاد = زابنك عن عضت بهام الهزيعه