منتدى نشامى شمر - عرض مشاركة واحدة

06-08-2009


	قضية البشت يافلاني..نطوي ملفه وننهيها.

عوداً على بدء نرجع لقصة البشت الذي أشرت إليه في شرحي السابق عندما طلب مني الصديق العزيز فهيد بن سلطان التميمي أن ألقي قصيدتي بالمخدرات قصة مروج في حفل توعوي عن مضار المخدرات بالجبيل الصناعية ووعدني بأن يعطيني بشته عندما إعتذرت بأنني جاي من العمل وليس لدي بشت إلا إنه لم يفعل وقد إشتكيته على الصديق العزيز الشاعر فهيد بن عقل الرميزان التميمي بهذه الهجينية :


	يراكب بنت شقراني = شقراء وعراض علابيها تيهية وابوها عماني = تمشي على كيف راعيها فوقه نديبي كحيلاني = لابو عبير(ن) معنيها أشكي عليه أبو سلطاني = فهيد التميمي مقاضيها هو اللي بالحفل دهواني = والله ما أحسبه يسويها قالي تقدم على شاني = لازم قصيدتك تلقيها وعدني البشت هقواني = وماكنت للحفل ناويها يوم وصل دوري وناداني = البشت جود مثانيها خلص يديني وخلاني = وقالي أنا أمزح بماضيها صحيح أحرجني يالاخواني = ودي أعرف وشو قصد فيها من الي كان غلطاني = يا فهيد تعرف معانيها نبي خروف على الجاني = أحكم وانا الحكم راضيها من الي غلط على الثاني = والعلم تعرف معانيها وصلوا على نسل عدناني = أزكى صلاة نصليها

ــــــــــــــــــــــــــــــــــــــــــــــــــ ــــــــــــــــــــــ

رد الشاعر القاضي فهيد العقل التميمي بهذه القصيده:


	ياراكب وارد ألماني = مخصوص للرد شاريها ينصى عزيز تنصاني = عن عطوة من تاليها وأنا مع الحق حقاني = أقولها ليش أغطيها مدام عمر البشر فاني = أغراضنا ليش نبكيها وتصرف فهيد ما ارضاني = دام العطية مبديها سمع الخبر هزهز اركاني = ووقفت والرجل محفيها من غير يوسف بما جاني = ما صدقه كيف قاويها صديق بافعال قوماني = نخجل على الناس نبديها والحق واضح للاعياني = على التميمي نصفيها خروف من غال الاثماني = وقضية البشت يسميها وان قال بالبر مواني = في راس هكالطعس نشويها وان قال بالدار يهناني = حتم المطالب نلبيها يا فهيد بالحق منداني = نفس الخطا لا تبريها وحذراك يقول ما اوفاني = تراي باشب وارميها لك ساس وصل وجداني = ودروب سلطان تمشيها أبوك للطيب سهراني = والحر ماظن يخطيها والمعذره واضح الجاني = نفذ وحذراك تعميها

ــــــــــــــــــــــــــــــــــــــــــــــــــ ـــــــــــــــــــ

وهذا رد فهيد السلطان على حكم فهيد العقل يقول :


	هلا عدد هل الامزاني = براعي القضية وقاضيها واللي ببشتي تبلاني = بشت من العام شاريها بشت عن البرد دفاني = من يوم هبت شماليها واللي يبي الحق جيعاني = كرشه من الجوع طاويها والقاضي اللي تحداني = قضيتن جاهلن فيها يا فهيد وشلون تنساني = وتنكر حججي وتلغيها هو بخششك وانت طفراني = ويلك من الله بتاليها حكمك ولا حكم نصراني = قضيتن بان خافيها وابوك من قوم شجعاني = للضيف تفتح قهاويها يا ولد عقل الرميزاني = النار بالعدل طفيها مع يوسف الجود ما باني = يا كيف يجهل معانيها أخاف من بعض الاعياني = يحسبني متصدقن فيها ولا هو فقير وبرداني = من لابة يفتخر فيها من شمر خير جيراني = ما اقدر اعدد حسانيها والمال بالبنك ملياني = اموالهم صعب نحصيها ولا تامن الوقت خواني = واسلم وسلم بتاليها

---------------------------------------

الا ان الموضوع لم يقف عند هذا الحد حيث اشتبك الشاعران بعدة قصائد هجائية كل منهما رافض رأي الاخر ومتحديه هنا تدخلت بالقصيدة الاصلاحية التالية :


	ياناس والحكي مجاني = بيوت(ن) نرتب قوافيها ذلول من جيش ابن ثاني = الدل والخرج زاهيها فوقه من الغوش هجاني = ومني رساله يوديها لفهيد وفهيد الاخواني = نصيحة نبي نسديها يا عيال ذربين الايماني = نبي الخواطر نراعيها ناخذ من القاف ما زاني = والفاظنا نعتني فيها لي لابة تكرم العاني = وتكسر خشم من يعاديها شمر لها الطيب عنواني = والطيب بالطيب نجزيها وتميم من ماضي الازماني = بروس المعالي مبانيها شيخان من نسل شيخاني = تاريخ والكل قاريها في مثلكم ماني بحلاني = ومن شك بالنفس ننفيها وحنا حبايب وخلاني = وقضية البشت ننهيها قضية حلها باني = كبشين للبر نديها علي أنا وابو سلطاني = وكل الحبايب نغديها عاداتنا كلها اسماني = والبخل ماهو محاريها ومن حرض الناس غلطاني = والنار تحرق مواليها وختام عذبات الالحاني = نفوس الحبايب نصفيها افهيد وافهيد صدقاني = ونفوسنا ما ندنيها وقضية البشت يا خواني = نسكر ملفه ونطويها وصلوا عدد نبت الاوطاني = على النبي في مثانيها

لقد وافق الجميع على هذا الرأي و إنتهت قضية البشت ومعركة الهجينيات.
والسلام عليكم ورحمه الله وبركاته..