رجال العرف مايلحق مداهم..=وكل الناس تعرف مستواهم
هذا مبدا قصيده واسمحولي..=عسى اصحاب الوفاء ندرك رضاهم
قنيف الموهبه قامت بروقه..=تلوح وقامت رعوده تزاهم
تحدر في بني سواد سيله..=ورب البيت سبحانه عطاهم
يابو مشهاب قدمت العزيمه..=ولايحتاج دعوه وانت فاهم
نعدك واحد منا وفينا..=كلام موكده ماني بواهم
نهنيك بسلامة راس اخونا..=عسى اللي صار لذنوبه مراهم
هذي الدنيا كفانا الله بلاها..=تبذ الناس وتبيح خفاهم
بعدها سلمنا يفرض علينا..=نرحب بالنشاما من غلاهم
هلا يامرحبا ترحيب وافي..=بضيفان لفونا من وفاهم
تراحيب(ن) يكررها لساني..=عن اهل الحفل وانا من حداهم
صحيح مجمعي ماني سويدي..=لكني مع بني عمي مساهم
امون ولاعليه في محلي..=وارحب واتعزوا بشعثاهم
محبتنا ورفقتنا قديمه..=مورخة(ن) على افواه اشعراهم
قصيد العوهلي باني بربعي..=يثبت للعرب فية عصاهم
غلانا عندهم ماينتوصف..=ولازود غلانا الا غلاهم..
هذولا قوم ابن باحص فداهم..=شيوخ النصب وشيوخ الدراهم
هل اللبل وان بدا وقت العزاوي=ياويل اللي يوقف في نحاهم
فعايلهم تزيد سبيع قوه..=على اللي قدمهم واللي وراهم
بهم عن باقي العربان ميزه..=زمان الخوف مايسهج حماهم
ومجالسهم مدارس للبطوله..=تواريخ اعقداهم وامغزاهم
تحصل ورعهم دايم يردد..=فعول اجدودهم وفعول اباهم
وكرمهم من يشكك في كرمهم=يروح وينشد الحقي وداهم..
مايشرون الا الخيار امن الذبايح..=غلا الاسعار عنها ماحداهم
ووفاهم ويش اقول اويش اخلي=يكفي فعلهم في ابل اقصراهم
يقوله حارثي(ن) وخذت ابله..=من الضيقه نصى الله ثم نصاهم
ياعنك انه تنصاله قبيله..=عسى اللي مايدانيهم فداهم
ابمدحهم ومدحي في محله..=لحان المدح حيالله نباهم
واطيبهم بدهن العود الازرق ..=وهذا عندنا واجب لحاهم
وبوجز ماكتبته في قصيده..=بشطر(ن) من صميم القلب جاهم
بني سواد مايلحق مداهم..=وكل الناس تعرف مستواهم
حمود بن قاسي المجمعي