سميت باللي للسماوات رفاع=شافي لحال ايوب عقب امراضي
وارسل محمد للسلف هم والاتباع=شفيعنا في يوم يبس اللحاضي
وجعل طريق المصطفى خير واشعاع=ومواقفاً فيها القناديل تاضي
الواحد اللي ياجر العبد ياطاع=ويعليه مايمشي طريق انخفاضي
من بعد ذكر الله للشعر بداع=جاشي بزينات البيوت استفاضي
يقول من هو للتماثيل مولاع=من ضامرٍ ياهيض بالشعر هاضي
وياراكبٍ من فوق ممتاز الانواع=من وارد الالفين والفعل ماضي
يطوي بعيدات المسافات بسراع=وقبلي شهد له بالمراويح راضي
مايشتريه اللي يحسب للا طماع=يشريه اللي حده من الوقت حاضي
اللي على قطع المسافات بتاع=عيونه سهيره ماتذوق الغماضي
ياداس بنصه صار للصوت دفاع=ارجاف مزنٍ تالي الليل ياضي
والياعتدل صوته مع المروحه ضاع=اليا عطاه واسع الخط فاضي
عليه منهو لاتكاسل ولاضاع=وقت السفر ماهو كسولٍ رياضي
يمشي قبل ماتسطع الشمس بالقاع=من شرقي النسيم شرق الرياضي
متنحرٍ داراً به المجد ماضاع=مشهورةٍ يوم السنين المواضي
دار الكرم مايذكر الضيف به جاع=من دور حاتم ماعليها اعتراضي
حايل بلد شمر شريفين الاطباع=اللي على فعول المراجل تحاضي
بشهادة الاجناب كله بالاجماع=شهدو لهم لوهم لشمر بغاضي
وافطن ترا في وجهة الغرب مطلاع=بين الجبال النايفات العراضي
يديك يم اللي لهم بالفخر باع=اولاد زامل للمراجل حواضي
ربعي الياصار الزمن حيل قطاع=والمبتلا زادة قواه انتفاضي
هم فرحة اللي للبهاذيل جراع=صمايلٍ ماقولها هرج فاضي
وملفاك من بيته للا بطال جماع=ودايم على كسب المراجل يحاضي
مناور محمد ياختفا كل رعراع=يبين مايتبع طريق الخفاضي
رجلٍ على نطح المواجيب بتاع=يفداه من يا شاف الاخصام جاضي
وحز ة وصولك للتراحيب سماع=في صوت عالي ما يجيه انخفاضي
لو قلت له عجلٍ ترا القرم ماطاع=واجبك عنده صايرٍ بافتراضي
ولياجلست وزان للهرج الاسماع=قله مكلف تاجد القرم ناضي
تقدير للمرسول ماهو ابمرتاع=وياجب على السلم القديم الحفاضي
وقله من هذا البيت لاشك مرجاع=وعطه الرساله في صفوح البياضي
رسالةٍ فيها مضامين الاسناع=مع علم ماياتي بعده انتقاضي
وفيها السلام اعداد ماتمطر القاع=واعداد نبتٍ للنفل بالفياضي
يابو محمد لاشكى جسمك اوجاع=عساك ماتشكي شديد الشواضي
اباسئلك ياديب وللرد سماع=لو ما انت للعالم كثير اعتراضي
قبل دخولك تفتهم كل مطلاع=وعندك على مجد القبيله احفاضي
ردك ترانا طالبينه بالاسراع=وشي خبار اللي جنوبه اعراضي
وانشدك عن كفٍ ظهر ماله اصباع=بين النيات وبين حد النجاضي
مادري تعرض له خبيثات الاوجاع=ولا كواه من اللهب حر لاضي
كانه على ماصار حاسد وملتاع=يابو محمد ماعليها تغاضي
مايجتمع ممشا الثعل دوم وسباع=ولا ينحكم بالشرع من غير قاضي
وصلو عدد ما يحصد البذر زراع=واعداد خلقٍ بالعصور القواضي
واعداد ما بالسوق شاري وبياع=على نبياً عنه الإله راضي