يستلج القلب لاهبّ الشمال = وينبلج صدري ليا شفت الجبل
بين أجا وسلمى مشاريف الجبال = إجتمعنا في دجى ليل(ن) هشل
ليلة(ن) ماهي مثل باق الليال = رفرف الخفاّق والكل إحتفل
ودامهم أعطوك ياشعري مجال = إنتهض مثل الأصيل إليا صهل
بسرج أمهار القوافي بإبتهال = وانظم القيفان والشعر الجزل
إيه أعرف إنّك هبالٍ في هبال = إن طغيت أنهيت كل غث وهزل
تِسكر عقول(ن) وتودعها ثكال = وكم صميّدع من تبهلالك زِِمل
إيتنّحى من تذمّه بإنعزال = ومن تبيه اتوّصله كوكب زحل
طال ليلي والعنا والشوق طال = وغير حايل ما ملأ عيني مَحل
دار حاتم طي وقروم العيال = منبع الأخيار في ذيك الُطلل
مارأت عيني مثل زينه جمال = إن رضى منّي عذولي أو زَعل
صيفها هايل ومرباعه خيال = وجوّها ياناس يفتلني فتل
وماالوم اللي تغنّابه وقال : = صوب حايل قلبي العاشق رَحل
ياسقى الله يوم غناّبه طلال = مالت اعذوق البختري والنفل
ديرة الأجواد وزحول الرجال = جودهم غيث(ن) تهامل وانهمل
ديرة أهل الطيب مافيهم جدال = طيبهم ديم(ن) على الوادي هطل
الله يغيثه من مزون الخيال = وترتع بغدرانه أجوال الحَجل
وعشت ياسعود السعد واف الخصال = يالأمير اللي على العليا نزل
كامل الأوصاف ولله الكمال = ضاري(ن) ساطي وزيزوم(ن) عدل
حنضل(ن) حلتيت بحلوق الحثال = وللهجافا فيّ وظلال وسهل
ارتقى بحايل طناطير(ن) عوال = قادها للمجد وكل سايح ذهل
يامعدّيها مراقيب(ن) طوال = ياهلال(ن) هل في حايل وحل
العرب لاشبّهت تضرب مثال = وانت ماتوفيك أمثال وجمل
السموحه دام أوجزت المقال = أشهد إن الشاعر ابوصفك بحل
قد سمعت ابمامضى حكمه تقال = خير قول المرء : ماقلَّ ودل !