سج القدم بأرضٍ فجوجه وسيعه=أن دك بك من هاجس الوقت دكاك
واشرف مشاريف الطوال الرفيعه=الوقت ماهو ماشيٍ دوم برضاك
دنياك ماهي دايمٍ لك مطيعه= تطيع يوم والصواديف تقفاك
ماهي منيعه ولا ملوكه منيعه=ولاهي عروض تجارةٍ ضمن الأملاك
كم حاكم بأيام حكمه تبيعه= ما طاوعت له وأنت ما جت على مناك
كل يوم له حاكم وحكمٍ وبيعه= يبايعونه وهي تبايع هذولاك
تفرض على الإسلام سنّه وشيعه= حكمٍ مميز وأخر الأمر ماجاك
ثعالبه تشبع وذيبه تجيعه= والسبع به ذلٍ وخوف وبه أرباك
تقدّم وتفهق بين غدر وخديعه= يا ما غدرت بدواهيٍ لا عدمناك
البوق طبعه والغدر له طبيعه= وحمامته تطرب على عظم بلواك
لكن من حبه وخوفه نطيعه=ونقول من يمناك لكفوف يسراك
والعمر ما يعادل دقايق ربيعه= والوقت يضعف همّتك ويقصر أخطاك
كونه شنيع والمساطي شنيعه= وأن مهلت لك قوت الحيل خلاك
هرم وفقر والمفاصل وجيعه= وسكر وضغط وزايد الحر يصلاك
دورة سنينه والليالي سريعه= ما عنه هروب ولا ملاذٍ وفكّاك
لكن أتعظ من قبل ثلجك تميعه= قبل الرحيل بسبت الأقدام تاطاك
ومن قبل يوم البعث وحشره جميعه= عريا وغرلا والضما داخل أحشاك
الأم تذهل من الهوايل رضيعه= تشوف به شوف ما هو شك شكّاك
نطلبك من حوض نبيك وديعه = نشرب منه كما أنت تأخذ منه ماك
ويا الله عسى جمعٍ محمد شفيعه= ضمنه نكون عن الدّرك هو والأدراك
اللي لنا بين حدود الشريعه= وحرّم علينا الكفر وفعول الأشراك