المزن سـاق ولاح زيـن بروقـه=يفرح بضوحه مجـدب البدوانـي
كـن الكهـارب تشتعـل بطبوقـه=وقام يتساوق غيم فـوق الثانـي
ومشيت ضايق مع ليـان فلوقـه=وسط الخضار ومزهر الريضانـي
الروض مخضر والطخى من فوقه=ماغير عشب وطـارف الرعيانـي
في فيضتن شاق النظـر زملوقـه=تطرد هجوس العاشـق الولهانـي
والصيد بالريضان شفـت فروقـه=لاذار تسمـع صفقـة الجنحانـي
يجهم له القنـاص قبـل شروقـه=والطيـر بايـت ليلتـه جيعانـي
كـن الشعايـل تلتهـب بحدوقـه=لاشاح شوفه من ورى الوديانـي
ويوم اتعب القناص فـك سبوقـه=واهوى على اللي مالهـا مزبانـي
حاس الحباري لين شفت شلوقـه=وراعيه يضحك يفتخـر طربانـي
الخرب من كفـه شلـق معلوقـه=لاهـد يشبـه هــدة العتبـانـي
يسلى به اللي غايبن عن شوقـه=ليله يـروح بضيقتـه سهرانـي
تجـذب خفايـا خافقـه بعروقـه=رمشـه يشـادي قايـد الغزلانـي
لاحت لعيني دالهـن فـي سوقـه=وناطحتهـا مـع دخلـة الدكانـي
تنورتـه مـن ردفهـا مفتـوقـه=فتقه سبايـب جسمهـا المليانـي
الردف يطوي لبسهـا مـن فوقـه=وشفت البياض بهبـرة السيقانـي
كـل العطـور بجمسهـا مدفوقـه=ينثر وراهـا المسـك والريحانـي
قامت تغنـج بالحـلا مـن ذوقـه=له مبسمن مثـل القمـر لابانـي
فيها الثنايـا تلتعـج لـه لوقـه=مثل البـرد لاطـاح بالسيسانـي
والله فلاهـي بالحـلا مسبـوقـه=واللـي يكـذب يزبـن الميدانـي
يفـرق حـلاه بطبعهـا وخلوقـه=وجسمن ورمشن للعـرب فتانـي
جديلـتـه بمتونـهـا مدلـوقـه=ليته يشوفـه شاعـر الربضانـي
قالـت عيونـك كنهـا مشنوقـه=راجع طبيـب الديـرة النفسانـي
قلت البلا عنقـن يزينـه طوقـه=وان طحت من رمشك تراك الجاني
قالت رضيت المحكمـه وحقوقـه=واللي يقـول بديـوي الوقدانـي
صارت مداخـل حجتـي مغلوقـه=ومالي سوى صبري مع الكتمانـي
كل الحلا فـي وصفهـا وعموقـه=غبنـه يشـب بخافقـي نيرانـي
وبالهرج يسحر خافقـي منطوقـه=مامثلهـا هرجـه وزيـن لسانـي
كـن الحنايـا بالقهـر مصفوقـه=ومحدن يروف بحالـة الغسلانـي
فرحة ضميري عقبهـا مسروقـه=يشهد بها القاصين قبـل الدانـي
ياغصن مـوزن ينثنـي بعذوقـه=وصفه يجيـده محسـن الهزانـي
ادخل على الله عن دروب البوقـه=تر صاحبك من خلقتـه ماخانـي
دامك رميتي خافقـي فـي عوقـه=وشنوح تترك طايحـن مرضانـي
وان رحت وعروق الحشى محروقه=فأنته بقانـون الهـوى غلطانـي
راحت وروحي بالقهـر مطقوقـه=واقف واطالـع نقشـة الفستانـي