يا مسوي الفنجال خص الأجاويد=فهود الرجال اللي لهم قدر وفراش
اللي بهم فتل وصدرٍ وتوريد=حماة الظعن يادوبح الخيش ونحاش
أن صار به كرٍ وفرٍ ولقاء كيد= لمع المهند بسلّته لمعة أفلاش
يمشي بهم سيد وياقف بهم سيد= أن صار في تال الظعن صوت لولاش
وكثر الصياح وثار صوت البواريد= يوم الشجاع من العدم والسطر شاش
يا جوك غبران الأوجيه النواكيد= تحري وتذري ياخدم النذل واللاش
اهل الدلال المكرمات البغاديد= سخاف الوسوط اللي تلامع تقل شاش
بأرباعهم تلقاء النشامى تقل عيد=ناسٍ حضور وناس يمشون مغباش
وياهبة النكباء ليالي جويريد= ومن الهوى ينزل تقل ثلج ورشاش
ترخص حلاله لرجال الصناديد= بصحونهم يلقاء مفاطيح وأعراش
وترك رجالٍ لرجوله مناقيد= هلوس الرجال مربية حدب الأكباش
على الطمع تجي عطاشٍ مواريد= رجالهم عبد للأموال حوّاش
يبيع بإيصال والأقساد تسديد= وتجارته بالسوق حلتيت وقماش
ماخص به زيدٍ ولا قول أنا عبيد= أخص من يقبض ثمن جودته كاش
ذكرت ما شاهدت بالعين تحديد= ماهو خبر رجلٍ عن الشين نقّاش
وأستغفر الله كان بالقول تزويد= أن كان لاحظتوا بهن زود إغراش
العمر يقضي والليالي سراميد= لوعاشن الأيام ما العمر به عاش
أطلبك يا مكرم نما ناتج الغيد= يا الله حسن الخاتمة عند الأقراش
وصلوا عدد ماتطلع الشمس وتعيد= على محمد عد ماطش طشّاش