أنا أبدوي وثوبي على المتن مسفوح = ونصبر على جور الزمن ومايلاته
ننزل وعرها والسّهل وننزل الصوح = وأحيان ننزل في قمم طايلاته
ونوب بها نشبع ونوب بها أشحوح=ونوب نجوع ولا نحصّل مباته
وأحيان نأكل بايتاً ماهو مملوح= من قل ماناجد من الزاد ذاته
ونمسح رمال الأرض والبال مسموح= والحافنا بعض الشجر من وزاته
ونوب يقل الماء وبه الصوت مبحوح= والنّفس ماتنساء زمن ذاكراته
ونوب على زل التباريز ياصلوح = من مصنع بإيران جت منتجاته
مع الغنم عشنا عوازيب وسروح= رحنا وجينا ولا شكتنا بناته
ونصبر على جور الزّمن بحزن ومزوح= ونردع بها نفس بغت مغرياته
نخاف من حكي به العرض مفضوح = تظهر خوافيها ويكثر شماته
من لابة تصبر لو الجسم مجروح = بحر اللهايب لين تنجض شواته
في صحصح مابين ذابح ومذبوح= قلّة عواذيله وكثرة شناته
خطو المشورب بساحة الحرب مسدوح= يومن خطو البنت ترمي عباته
كل أبلج في كفه السيف له ضوح= مثل لميع البارقة مرهفاته
في ساعة يرخص به المال والروح= إمّارها خافة وهابة غزاته
ماتقبل العوجاء وتسكت كماء اللّوح = دحوش تحسب المرجلة في سكاته
نصير بعيون العداء تقل ذرنوح = ومن لاحمى فرقه كلا الذيب شاته