البارحه مانمت ضايق ومغبون=عيو علي بالنوم ناسٍ غشيمه
ناس بفعله تغضب الرب وشلون=بأسبابها خشاش الصحاري سقيمه
زمل عليه العفش ومحزم عيون=قام يتخبط وانتثر بالعتيمه
وين الرجال اللي من الله يخافون=وين الرجال اهل العقول الحكيمه
البل عطايا الله لها عشق مجنون=ما غيره زود ونقص بقيمه
يامغلين الذود تكفون تكفون=ما للفسق إلا عواقب وخيمه
مدري جهل بالدين والاتعرفون=والا هياط ونفعها ظل غيمه
تباشرو بيناتهم جاك مزيون=كنّه يبشر بالعراق العظيمه
ناس توكل طفلها خبز بديون=ومليون يصرف في براطم بهيمه
شوفو عزيز داخل الحبس مسجون=مسجون من كثر الكرم والحشيمه
وألا عجوز ضامها الوقت والهون=ضناه واحد رافضاته حريمه
الجود والاحسان والرفق والعون=أربع ماهي بدروبكم هالعقيمه
ياليتكم ناس حريصين وعفون=ولا نعمة تنكب عسى الله يديمه
انا بدوي في سلمنا حيل مفتون=واذواد نملك بالسنين القديمه
يوم إنها مابين طاعن ومطعون=نذود عنها ماخذوها غنيمه
يالايمي لو لك معاوين ومتون=ما زعزت شخص فرد بالشكيمه
الحمد لله دايم إبليس ملعون=النفس تصبر لو ظروفه أليمه
تبطي ويبطي من بنا عمره ظنون=اموووت لكن ماتشوف الهزيمه