يسج الخيال احيان عن سكة السالين=واشوف المدينه بنت.. سكانها ثوبه
ليا قصّروا سكانه بسلم والا دين=قصر ثوب حشمتها وبانت لنا عيوبه
اشوف التذلل عيب في طبعها ويبين=لاشفت الرجال تمد للمعطيه كوبه
علام الرجال تصف طابور للمعطين؟=عقب ما ملى المعطي من جدوده جيوبه!!
علام البشر تمسك سرا للردى فرحين؟=بعد ما طنا جده عن النقص ودروبه!!
يجيب الغنيمه كيس والا بعد كيسين=وتراقص من الفرحه علابيه وجنوبه
انا طالبك ياللي تطق بابهم كل حين=ليا صرت من (****) قل الاسم اكذوبه
قل انك من الخارج او ابعد حوال الصين=ترى الكذب بالحاله ماتحسب لك ذنوبه
ولا تجيب طارينا نجي كلنا شرهين=لا رحم الردى كانه تسمى بنا خروبه
ياوين الحرار اللي لها عزة الشاهين=تعشّى فروخه حيّ صيدات وقلوبه
ماحوّل على لحم الفطيسه سوى الدانين=شباعا ولكّن الطمع بان عذروبه
ضعاف النفوس تبين لا بانوا المعطين=تراكض مثل مركاض جده لماجوبه
ربينا على العز وشريناه لو هو دين=ولا وقفتٍ تحسب على اجدادنا كوبه
اشوف المدينه بنت في خدها وسمين=عقب ماهي بزينه من الكل مخطوبه
اصيله وزفوها على ساقطٍ وعفين=وجابت من يفضّل على العز مكسوبه
يجيب القدر ناسٍ على سكة الصاحين=ونشوف الاصيله يصقل العفن عرقوبه