قالو تقدم وألحق الناس بالناس = وحقق لنا من دونها صعب الارقام
أطلع وكمل ما بديته بكراس = وهات الشهاده في مخايير الاقسام
وخل المرجل عنك وحذفه بالياس = واترك هل الكيف المصفى والاقرام
وانزل لديره شربها دوم بالكاس = ما تعرف الفنجال ولا دله أكرام
وأن طعت شوري لا تعدى لتكساس = وأشبع نظرك اليوم في حلو الاجسام
ولا عاد تطري فعل عنتر وجساس = وخلك مع الاتراك وفعول الافلام
والحمد لله كان ردي على ساس = وردي مثل ما تفعل فعول الاسهام
العلم عندي مرجله والكرم باس = والطيب أسوقه مثل ما أسوق الاقدام
ولا همني هرج المعادين الانجاس = مثل الجبل ما يهزه أرياح وأجهام
واللي ما عنده مرجله فوق الاحساس = ماهو حرام أن مات هالحين بأعدام
ولا عاد يطري له ذكر بين الاجناس = لوه ولد شيخ (ن) وسباق الايام
والهم عندي يلتوي لوي قرطاس = ولاني أحسب الوقت ولا عد الأيام
ما دام ربعي مالهم أي مقاس = شــمــر طنايا الوقت والعزم قدام
والحين أبنهيها على كل هوجاس = وأقول يا جيلي ترى الوقت مادام
وأختامها صلو عدد دق الاجراس = على رسول الله وتباع الاسلام