الاولـه للوالدين الحشامـي=لهم معزه ماهي الباقي الناس
دايم هم اللي في محل اهتمامي=مرضاتهم للي بغا الزود نوماس
واخوي في عسر المواقف حزامي=اخوي وابني غير عن كل الاجناس
اما ولد عمي لصدري وسامي=والا على قول العرب تاج للراس
وايضا الصديق اللي عليه الكلامي=اقدره واقف مـعه حـزة الباس
والجار له واجب وقدر اومقامي=بالنفس عما يوذي الجار هوجاس
ومقام ربعي في سماء العز سامي=مقامهم عندي مشيد على ساس
وباقي العرب في خانة الاحترامي=كل واحدٍ له بالمقامات مقـياس
هذي مفاهيمي وهذا نظامـي=والناس كلن له مفاهيم واقياس