حي الله اللي عنده القاف مصخور= جزل المعاني للمعالي ترومي
حياك ياعابر شذا الشيح والنور= لولا جبينك يابو فارس علومي
ودي بشوفك ياخلف كل مسطور= شوفة مثل شرواك تجلا الهمومي
لكم بياض الوجه من سالف عصور=ولاهو غريبٍ في نباكم يدومي
العرف والمعروف ثابت ومذكور= تشهدله العربان ربعٍ وقومي
فنجال طيب ومدته كف ممرور= وحجاج طلقٍ مايعرف الوجومي
يسوى ضيافة عام ومعزبن ثور= فرقاه عيد وقل عرفه لزومي
شرواك عز لمن بغا الكيف والشور= وذخر الصداقه بالشدايد تزومي
غالي ومن دار الغلا مرتع الحور= حايل مقر الجود ريف القرومي
لايابعد ابها وعرعر وابا القور= ولاياخلف سيف البحر والخرومي
تفداه من فيفا الجنوبي ليا صور=وتفداه طنجه والسواحل عمومي
ياديرة الوافين والطيب مخبور= دار النشاما حافظين السلومي
لومسكني بالصين ومن دونه السور=من دون شوفه ماتردت عزومي
نوبٍ ظروف ونوبٍ الحظ مثبور= يقلع مدى الرجال لو هو جزومي
العذر منكم ياحصل نقص وقصور=ننوي وتصريف الليالي تحومي
يالايمي في غربتي غصب معذور = يامن يبدل بالبراد السمومي
المبتلا يستعذب الصبر مجبور = بالكبد جمره والمعاليق تومي
اقفى العمر ونا ورا الغاط مثبور =مدري متى بطويق يقضي لزومي
فالادمي لاشك منهي ومامور=ولو زانت الدنيا فهي ماتدومي
اللي يجمعها الوفا ماهي الدور= واللي يباعدها الجفا والظلومي
الله يفرج هم الاجواد والجور= ينزاح عن قلبٍ عطوفٍ رحومي
لولو ومرجان وزمرد وبلور = تهدا لبو فارس وهذي علومي