الشوق مـا يرحـم جريـح المحبَـه=تهزه الذكرى لو الجـرح مـا طـاب
لو هو يكابر في هـوى مـن يحبَـه=ما يشكي الفرقـا ولا يذكـر أسبـاب
تلقى جروحـه ف المحانـي تربَـه=وتلقى دموعه واقفه وسـط الاهـداب
لو كان حافـظ حـق نفسـه و ربَـه=مير الزمن حده على جور الاحبـاب
وانا شبيه اللـى عنـا الوقـت ذبَـه=على طريق الحب من باب الاعجـاب
اليا طرالـي يـوم اهوجـس أسبَـه=واستغفر الله وأقلب بيوتـي أعتـاب
سلمـتـه الخـفَـاق لـكـن لعـبَـه=أثر الامانـه مالهـا عنـده احسـاب
يومـه تملمـل صـد عنَـه وكـبَـه=خلَى خفوقي ينطحـن بيـن الانيـاب
فرقاه رشـاش ٍ علـى البـال شبـه=ذكراه طلقاته و الاحسـاس منصـاب
بحر الهوى ما عـاش منهـو يطبَـه=أما سلم مجنون او عارضـه شـاب
وداء الهوى محد ٍ لقى اليـوم طبَـه=الا من اللي في يـده كـل الاطبـاب
قلبي غدا مـن عقـب خلـي منبَـه=اليا غفيت اشوي يصفـق بالاحـداب
مطعون و المطعون من غيـر سبَـه=تلقى شعوره من هوى الغيد مرتـاب
عـزاه يـوم اوضاعـنـا مستتـبَـه=كنت اشعر انه غير عن كل الاصحاب
و اليـوم بيَـن كـل خافـي تخبَـه=يحسب قلوب الناس من ضمن الالعاب
سبحت بحـر الشعـر غبـه وغبَـه=جمعت منه الوجد والشوق ف كتـاب
أحيان احـس ان الاحاسيـس صبَـه=وأحيان احس انها كما الملـح لا ذاب
وأحيان أسبه وارجـع اقـول أحبَـه=لا خاطري مرتاح ولا خافقـي تـاب