جاز الكلام بطيب والشك زايل = وبيض النوايا فتقت سود الأوهام
ريح العتب عطر جزيل المثايل = الي لها مع طيٌب الشأن مرسام
الي يحوش من الوفاء والجمايل = زود على على كل الوزايع والاقسام
قله غدينا بين عدل ومايل = ودايم نشيل الحظ والحظ ماقام
رحنا ندور كل مفتي وقايل = ونسمع تفاسير الطواري والأحلام
ندفن ورى حدب الضلوع النحايل = شرهة رفيق كلمته دوم قدام
تحبل لنا النفس الخبيثة حبايل = يوم بعد يوم وعام بأثر عام
يادمع مادري دم ويشفيك سايل = هيضت قلب حيلته ضيم وهيام
طالت ولكن ويش لنا بالطوايل = طير السعد وقٌع وطير الفلس حام

أهلاً هلا بموصلين الرسائل = من واحد يشكي علي ضيم الأيام
من عيلم معروف بين القبايل = بأرض الجزيرة من يمنها الى الشام
سعد ابن عبار والجد وايل = من لابة فيهم مقدام وكرام
ياركبو الويلان فوق الأصايل = عاداتهم خويهم دوم مايضام
بالمعركة مثل السيوف السلايل = وببيوتهم مثل السلاطين حكام
والخال من شمر كرام الخصايل = شمر لهم بالمجد تاريخ ووسام
الي يدوسون الخطر والهواايل = يوم المعارك ماهي تمثيل وافلام
شمر هل الردات واهل الفعايل = ماهو كلام للدعاية والاعلام
يشهد جبل شمر وسلمى وحايل = على فعل شمر وابو بيص مانام
فيهم كرم حاتم بذبح الجلايل = وفيهم طنا شمر وتشمير الاكمام
ياسعد ندري بالزمان متمايل = الذيب يجفل والثعل صار مقدام
واسبتدلت بعض البشوت بفنايل = وحتى الاسامي بدلوها بالارقام
والصدق بدل بالدجل والفشايل = وقست قلوب الناس في قطع الارحام
من قارن الحاضر بعصر الاوايل = فرق الهلالي يامشى بين الاقزام
ونهاية الدنيا عليها دلايل = مالوم ابو عبار لو زعل مايلام
وصلاة ربي عد وبل المخايل = صلو على المبعوث في دين الاسلام