ياسيدي حلمك كلتنا الذيابه=اهل العقار وحاكرين التجاره
تناهبونا يابو متعب نهابه=هذا رفع سعره وهذا اجاره
من بينهم صرنا تقل وسط غابه=ما كننا بديار خير وحضاره
ما يخجلون ولا عليهم رقابه=يا خوفتي كان البلا با الوزاره
من يوم خيرك حل والرب جابه=شنوا علينا غارةٍ تلو غاره
والراتبين اللي حسبنا حسابه=طارت مع العجًه غمتنا غباره
انظر حليب اطفالنا ويش صابه=بايام عيد الفطر وقع قراره
لما سالت الصيدلي عن اجابه=قال الله اعلم والتجاره شطاره
اقفيت عنه وكل وجهي كآبه=لو ما ستر ربي قطعت الاشاره
والبيت لو هو صندقه او خرابه=فاتورة الكهرب تعده عماره
اثر المواطن لو يشقق ثيابه=معذور دام انه يحس بمراره
يا سيدي كل المواقف تشابه=والنار دايم تبتدي من شراره
وانا ابنكم ماني بغاوي كتابه=ولايوم قد خنت الوطن في عباره
انا رجل دوله يثمٍن خطابه=ماني من اللي يعشقون الاثاره
هم الوطن همي وعشقي ترابه=وقار شعري نابعٍ من وقاره
وانت المطر للي يخيل السحابه=وانت الذرى للي خذى السيل داره
يهتف باسمك شيبها مع شبابه=اشر ترانا دوم تحت الاشاره