في كل يوم يغيب عن عيني اصحاب=ما اشوفهم ثاني سوى في حلومي
كلٍ يروح وكل فرقى له اسباب=ما غير خلاًق العباد معصومي
من مات مات ومن حيا بات منصاب=بين التوجد والسهر والهمومي
هذا بحادث راح معه الونس غاب=والآخر ايقض بس عيًا يقومي
ونظرت حولك جل من حولك اغراب=صقرين يمكن والبقيه رخومي
وبديت تحسب للقدر ميًة حساب=لامن ذكرت ان المعاليق تومي
وين المهار ووين طلقين الاشناب=وين الذي لاسرار قلبك كتومي
وين الذي شالك على روس الاهداب=وين الذي قلبه نظيف و رحومي
وين الذي ما كدًرك يوم واغتاب=وين الذي لا نمت قبلك تقومي
وين المهاة اللي تنسيك الاتعاب=لاشافتك تعبان عجزت تنومي
تسهر لجل عينك ولا تبدي عتاب=تطبخ غداك وهي قدرها تصومي
قبل الدوام تودعك في ذرى الباب=تقول حاسب يابعد كل قومي
وش لذة الدنيا ليا غابوا احباب=يا شين لا جا يوم صرت معدومي
آمنت با اللي للبشر نزًل كتاب=مالي برجوى غير ربي لزومي
الموت حق ويجرعه شايب وشاب=قانع مدام الله هو اللي يدومي