كان الاذى ما جاك من اقرب الناس=لا تنطره ياتي من ابعد بعيدي
معظم قرايب ها الزمن صاروا انجاس=عن ذكرهم تكرم بيوت القصيدي
ارحمهم اللي ينثر السم با الكاس=عصير طازه عاصره (تو) بيدي
اشربه كله لا يساورك وسواس=للطيبين امثال شخصك يفيدي
وآخر يوظف لجلك اثنين بلاس=يتلون ظلك تقل يتلون صيدي
شراهم بماله حقودين وخساس=اخس وانجس من بليس المريدي
وقدام عينك سمعتك ترفع الراس=كلن بفزعاتك وطيبك يشيدي
معدنك غالي عندنا مثل الالماس=يا مسهلا بك شوفتك يوم عيدي
منافقين وكل مربحهم افلاس=احرار لكن للنذاله عبيدي
تسديهم المعروف يسدونك اتعاس=وان جاك (ضر) الكل يصبح سعيدي
وان صابهم مكروه ما زارك نعاس=تفزع لهم حتى بدم الوريدي
(الميت) اللي مات في قلبه احساس=والغانم اللي مات موتة شهيدي