يوم قررت اهجر الحب وابعد واصوم=نقٍضت لي جروحي ظبيةٍ شارده
قلت للشعر تفزع لي ؟ وقال معزوم=عنده ايقنت حوض الموت انا وارده
التهقوي ماهو سلمي وعنه محشوم=من وقع في شبكهن ربنا قارده
ما خبرت الظبا يا ناس تلبس هدوم=ولا سمعنا عنود لشعرها فارده
بايع البرد مايدفيه لفح السموم=با الشتا وين يلفي لاصبحت صارده
صرت منهوب في بيتي تقل وسط قوم=بدًل الياس سيفي عسبةٍ جارده
قمة الغبن لو تذبح ولا لك خصوم=ذابحك راح ياكلها وهي بارده
نم مع جروح نجل ان كان طاوعك نوم=خل شيطان شعرك يشتكي مارده
مانت قادر تنام ولانت قادر تقوم=ومانت قادر على الحبوه ولو يارده
الظبي لو يذيًر ما براسه هموم=البلا والجلا مدفون في طارده
مرتعه با السهال وفوق روس الحزوم=ما هقيته بوسط (النٍت) يا شارده