هاهكذا موت الشجاع ابن الشجاع ابن الشجيع = اللي قضى نحبه حبيس الظلم واهواء الظليم
وش عاد لو قالوا قصاص .. القص شرّعه الشريع = فلا اعتراض ولا جزع .. ولاحزين ولا كليم
قادوه مدري قادهم .. بعد استقام وجا مطيع = للحق قدم هامته مطواع للشرع القويم
ماقدمه ذل ووطى .. لامستريب ولامريع = لله خضّع ناصيتْه الناصعه شهم وشميم
ساق الخُطى .. سَوق العطا .. ودّاع والله الوديع = سمحٍ قبال استافته .. وِخْراه عن عيشٍ وخيم
هات الخبر .. ود الخبر .. يامن خبر .. سيفٍ لويع = سيفٍ بكى مسيوفه اللي من مهابه له لطيم
دين ويمين بذمته حرّم فلا عاده قطيع = سبحان من ذا قدرته السيف كيف انه يشيم
شفتو قبل هذا الزمان سيوف ماتت من منيع ؟! = اليوم كلٍ شاهِد الاملح عقب دمه رميم
لله درك ياولد فندي يابوفندي واذيع = اللييييث يوم انه لقى حتفه تثاغنّ الهليم
ابوك يابنت الجبل .. جبل تعلاّ فوق ريع = كل ما حدر دمعك مع الريع اكتوى ركنه حميم
واليوم بابنت الجبل .. كلٍ لجل عينك شجيع = اخوان وابوان وعمام ولابةٍ تضرم ضريم
ياذيب ياذيب الجبل وعوالك اللي له صديع = دونك صداه بهضهض المعلوق يدوي بالصميم
منته وحيد بهالمصاب .. مصاب حايل من جميع = اقطارها .. واطيافها .. والمرتحل .. واللي مقيم
يالله فيك المرتجى .. والملتجى .. وانت السميع = وانت الاله الواحد الفرد الصمد وانت الرحيم
ندعو جنابك باعظم اسماءك وجينالك ضريع = من رحمتك .. واسدل ستار المغفره للمستظيم