لا والله الا في دروب القلب عذبت الركاب= شديت ركبي يادروبي ومتطيت اصايله
اخذت من عزمي روى واخذت من قافي زهاب= قافٍ يسليني وانا مع ها الدروب الطايله
واخذت لي صوله وجوله في ميادين الرحاب= وكلٍ بفكره مهتدي لونه يضيع القايله
الى برق برق الشمال احسب له مية حساب= والى برق برق الجنوب اسهر معه واخايله
ان غبت افكر بالغياب وفـي مغبات الغياب= واللي سمع لحكاي واللي ماسمع لحكايله
اخشى على جاهل يحسب إن الخطا مثل الصواب= مايدري ان المستهديه غيردرب العايله
لولاي امنّي خاطري بالفوز بأجر الاحتساب= ونّ السعاده ما تـدوم وكل شـده زايله
ونّ الله الهادي لمنّي قمت اناجيـه استجاب= ونّ الله الحافظ من ادروب الضلال المايله
ونّ الامور مدبره والعبد بين اخطا وصاب= ونّ ابـن آدم ينفعه مـن العمل فضايله
ونّ العمل خيره وشره لايغادره الكتاب= والصدر صندوق العمل تلقى بها حصايله
ونّ العمار اللـي بها الدنيا بيقفاه الخراب= ونّ البروج اللي تعانق للسما ء متهايله
ونّ البشر كل البشر هذا تـراب من تراب= ونّ الحياه اللي على هـا الكون لله آيله
ونّ الحياه اتهون من بعد المروه والشباب= ونّ العـزائم فـي عقاب العمر غيـر اوايله
ونّ السعاده والهناء بالفوز في اعظم جواب= الفوز في اعظم جواب اللي يخوّف سائله
ويوم إن حظي مـد حبله في سبيل الاحتطاب= اللي حوا حبلي من المقسوم جبته شايله
ود ي لو إن الحظ سهل لي عسيرات الصعاب= والى سريته ولعت لي بالدجاء فتايله
ودي تجي نفايله من كل صوب وكل بـاب= لعلها تستر علـى بعض الرداء نفايله
ولاني مزكي راس مالا مايجي قدر النصاب= واللي يريد المدح دايم تمدحه فعايله
يارب عفوك ياكريم الوجه واليك المتاب= استغفـرك يارب من كل الـذنوب الهايله