المرجلة ما هي تجي بهون وبلاش= إلاّ بذل كف وعطا مال ونفاق
تبي كريم مقدم الوجه بشاش= دايم على فعل المواجيب سبّاق
بصياني يجدع بهن حيل وكباش= يقلط عليهن من على الطيب مشتاق
في مجلسٍ به زل ممدود وفراش= عليه تجلس مزبنة كل من ضاق
بمواقف فيه الثمن يندفع كاش= بيوم غشا عج الرمك روس الأطباق
ببيت مبرهج يدله كل هتّاش= في مجلس والعجل من جاه ينعاق
وتلقى سوالف شايب تنعش إنعاش= سوالفه عند النشامى له أذواق
شهب نواصي جبهته بيض ورباش= من كثر ما تشرق بهن شمس الإشراق
من لابةٍ رجالهم كل ما هتاش= يسكر سطر زومٍ ويروق يافاق
يوحش قباله بساعة الضيق ياشاش= مثل الجنازة لطوابير صفّاق
به فعل من هو قاد قوات الأحباش= بالسيف لرقاب المناعير حلاّق
له هدت تأخذ به الخيل مكداش= وله قيمت يمشى بهاء لعتق الأعناق
ولا هو لغرات الأجاويد نهاش= وقت الرخا مثل العسل كل ما راق
والشجرة اللي ظلها دونه إغراش= حر الهجير أخير لو يحرق إحراق
والمجلس اللي يزحمك فيه وشواش= مالك وماله والسّعة تعطي أرناق
وأن ضاق صدرك وصار بالفكر خرباش= تر بالسّعة تفضات بالٍ ليا ضاق
برفقة ثلاث صافياتٍ تقل شاش= من السوق تأخذ له من البن ما لاق
يافاح ريحه ينعش الخاطر إنعاش= وبهارهن من ناتج الهند وعماق
يغدي خوى رأس على البن منداش= بحضور ربعٍ واقفينٍ على ساق
ينفض هجوسك نفضت الريح لقماش= يوم الحبيب لمدمج الساق سوّاق
يحطها من بين جفنه ولأرماش= ومهمته يدوج به وسط الأسواق
عزك لنفسك لو ظلالك من أخياش= ولا بالعلياء لك محلات وشقاق
وابن أدم للقبر ما يملك وحاش= عليه فتحات اللحد تغلق إغلاق
والخاتمة صلوا عدد رش رشاش= على رسول علّم النّاس الأخلاق
= شعر / بهلول حمدان الشمري