الهاجس اللي بالمعاليق دوّاء=زلزل براكين الضماير رعيده
نسهر مع الهوجاس وبالصدر سوّاء = أحدث جروح قام ينزف صديده
شقق معاليق الضماير بقوّاء= بحد الرماح مرهفات الحديده
جسم المحب نبت عذوقه تلوّاء= جفت جذوعه والصخاني شديده
في تالي الكنّة من الحر ذوّاء = أبعد ثرى قاعه وسفسف هميده
كنّة مزونه وسبل نبته تزوّاء = والراعي أخلف شربته من لبيده
يشدا جسم هرش من الجوع خوّاء= الرعي والماء ما سلكهن وريده
كن الحرايق داخل الجسم ضوّاء = بالجوف نار تشتعل به وقيده
على الذي هلا ورحّب وقوّاء = فتح بريدي يوم أنا أغلق بريده
ودي بهاء من بد بنات حوّاء = لكن مديدي مخالفٍ عن مديده
أصد وغضي عن جديد الفتوّاء = عن شوف نوار الفياض الجديده
زوله كما زملوق عشبٍ تروّاء = عليه رذاذ الديم يمطر مزيده
مامن حكم يصدر نظامٍ يسوّاء= يوم المحبة شربكتها المكيده
راع الهوى مثل الفطيم يتغوّاء = وشكوى لغير الله ماهي له مفيده
البعد بديارٍ فجوجه خلوّاء = لعل تنسيك السهال البعيده
عن مايهين النفس خلّك تنوّاء = بعد الديار ولا الحيات الزهيده
اكفخ كما حرٍ كفخ له بعوّاء= تل السبوق وطار حين أتهديده
وأبعد عن اللي يوم يزجر بقوّاء= حمرٍ عيونه حين ينفخ وريده
خلّه وخل اللي بفيّه تهوّاء = مثل الذي يجمع بجحره رديده
احسن منه عشب وغداكم مسوّاء= برفقة عيال الكل منهم وليده
تسوى حيات المملي اللي تحوّاء = تقل احتياطي البلد في رصيده
وختمت ما برمج ضميري وسوّاء= بأزكى صلات مالفح من جريده
= شعر/ بهلول حمدان الشمروخي