هات القلم والبوك والشعر زكّه= عن ناقد يقول ما الشعر مازون
من هاجس شك المعاليق شكّه= يرتاح يوم وعشرة أيام مشحون
يا دار دولاب الحشاء وستدكّه= يلطم غثا سيله على رأس زعنون
ياخذ مع الأشعار دكّه ودكّه= بـين الجديد وبيـن اللي قبل مخزون
يا الله يارافع حجر بيت مكّه= ويا سامع اللي بالمساجد ينادون
تفرج لمن قلبه غـثا الوقت حكّه= حكة حديد بالمخارط يحكون
من قول قولٍ سامع القول شكّه= وليا سألته قال هو مالك أعيون
يلملمه من دار حيفا وعكّه= أكذوب تنقل وقول قولٍ يقولون
أبعد عنه مع كل طرقٍ وسكّه= وأجلك ورزقك عند الإله مضمون
ماهو لزوم فوق متنك تعكّه= تصبر على غثا الردي وأنت مغبون
وأن ما حصل بعده ولا منه فكّه= وحفر بكبدك جرح ماله يداوون
صكّه على مقدّم الوجه صكّه= أن كنت تقدر وأخر العمر مدفون
الرمح بنحور المعادين ركّه =بصدور من هم للعواجة يحبون
ولولى الخطاء والعوج محدٍ يدكّه= والسيف لولى حاجته مايشيلون
وأبن أدم من الموت محدٍ يفكّه= والروح طير وال كل طيرٍ يصيدون
وأن ضايقوك أعداك ودنياك ضكّه = أزبن على حصن عن الضيم يذرون
عين العدو كان أنت قدرت بكّه= لا تقبل الذلة ولا تعيش بالهون
وصندوق صدرك للعدى لا تفكّه= وأحذر عيال العجز لقفله يفكون
خلك كما باب صدى الوقت صكّه= تر الرجل صدره على السر ماعون
والخاتمة صلوا على نور مكّه = عدد حجيج البيت ومابه يطوفون
= شعر / بهلول حمدان الشمروخي