يا الله عسى مزنً نشاء له هماليل= يمطر على دار جفا الوقت ضافيه
توضي مقاديمه وغيمه تقل ليل= مقادمه تضحك وتبكي تواليه
هطّال همال على الأرض له سيل=يسقي شعيب ممحلاتٍ سواقيه
يمطر على شهب الدايار المماحيل= عقب المحل تخضر جوانب نواحيه
ويزهر نباته بالسهال المقاحيل= صفرٍ نواويره وزرقٍ مكاسيه
مثل الخضاب بكف شقرا مجاديل= بحفله خطوبه والأقارب تحاضيه
يصبغ على اللبه زهوره تقل نيل= ويضفي على الشامات واللي حواليه
ينثر عبيره فايحٍ فوحت الهيل= رذاذ هطّال المطر تو مسقيه
ويرتاح من كان الدهر ضاغطه حيل= عليه جار الوقت وضاقت مساعيه
صفت يدينه والليالي محابيل= وعظ الزمن نابه وكضّم بشافيه
واللي يحب البر يأخذ تجاويل = تجوال صيد بالديار المهاميه
يشغل بهاء صدرٍ همومه تجي هيل= طراوته زلّة وكثرت مشاكيه
حمّل عليه الوقت شيلٍ على شيل= لو زان يوم يشكي العمر تاليه
يا الله يامهلك جماعة هل الفيل= يا ناصرٍ موسى على اللي معاديه
تفكنا من شر حقد الرجاجيل= زين النباء وعظايم الشر يخفيه
وتجعل لنا حظٍ قويٍ عن الميل= أن سمّرت على الرجال المناويه
يا حيل من لا كان بالناس له حيل= يا مخرجٍ يوسف من الجب لابيه
يا مكلّف برسالة الدين جبريل= على صدر من أمته تقتدي فيه
عند الحساب تخف عنا المثاقيل= يومٍ به المرضع جنينه تخليه
والشمس من روس الخلايق قدر ميل= حساب وعذاب وزايد الحر يكويه
حفيا وعريا لا شرابٍ ولا كيل= ولا من صديق تشتكي له وترجيه
في ظل عرشك ظلل الرأس تظليل= في ما قفٍ كلاً بمافيه كافيه
وتمّت وختمت القيل يا متابع القيل= صلوا على اللي في كتابه مزكيه
= شعر / بهلول حمدان الشمروخي